Өглөө.мн Шинэ өглөө, Шинэ мэдээлэл
“Elle” сэтгүүлээс 2014 онд дэлхийн спорт, кино, хөгжим, технологийн салбарт болох онцлох үйл явдлуудыг нэрлэж байна.
Сочигийн олимп ирэх сарын 6-23-нд болно
Ирэх онд спортын салбарт болох ¹1 үйл явдал буюу Сочигийн олимпийн талаар илүү үг нурших хэрэггүй биз ээ. Юутай ч хоёрдугаар сарын 6-наас эхлэн дэлхий ертөнц ОХУ-ын Краснодарын хязгаарт болох өвлийн ХХ их наадамд анхаарлаа хандуулна.
Хөлбөмбөгийн ДАШТ сар үргэлжлэх нь
Бразилд “FIFA World Cup-2014” хөлбөмбөгийн 20 дахь удаагийн ДАШТ зургаадугаар сарын 12-ноос долоодугаар сарын 13 хүртэл явагдана. Тэмцээний нээлт Сан-Паулу хотод болох бол шувтаргын тоглолт Рио-де-Жанейрогийн “Маракана” стадионд болох юм байна. Харин хэний баг алтын эзэн болж, 35 сая ам.доллар хүртэхийг долоодугаар сарын 13-нд мэдэх боломжтой.
“Формула-1” Сочид болно
Өвлийн олимпийн наадам болсон Сочи хотод аравдугаар сард спортын бас нэг томоохон үйл явдал болно. Тиймээс Хар тэнгисийн эрэг энэ жил олны анхаарлаас гарахгүй гэсэн үг. Энэ удаад “Формула-1”-ийн Гран-При уралдаан болох аж.
Жүдогийн ДАШТ наймдугаар сард зохиогдоно
Ирэх зун буюу наймдугаар сарын 25-31-нд ОХУ-ын Челябинск хот жүдогийн нийслэл болон хувирна. Энд дэлхийн хамгийн нэртэй тамирчид ирж өрсөлдөх юм.
Шекспирийн мэндэлсний 450 жил
Энэ жилийн хамгийн том ой бол Уильям Шекспирийн мэндэлсний ой юм. Манай гарагийн хамгийн нэртэй драмын зохиолчдын нэг түүний ойг дэлхий дахин сүр дуулиантайхан тэмдэглэх нь гарцаагүй.
“Оскар”-ын шагнал гардуулах ёслол
Улаан өнгийн хивсэн дээгүүр алхах ганган хээнцэр одод, кино наадмын дээд шагналын ялагчдын нулимсыг та гуравдугаар сарын 2-нд харах боломжтой.
“Биллийг устга-3”-ын нээлт
Кино ертөнцөд 2014 онд болох гол үйл явдлын нэгээр Тарантиногийн найруулсан кино яах аргагүй бичигдэнэ. Одоогоор уг кино хэдийд дэлгэцэнд гарахыг нууцалж байна. Харин гуравдугаар ангид Хар Мамба (Ума Турман) 88 галзуугийн хоёроос нь өшөөгөө авдаг аж. Асар их цус, үзэн ядалт, гайхалтай саундтрек гээд энэ кино үзэгчдийг алмайруулах нь дамжиггүй.
Леди Гага жазз
Дуучин Леди Гага “Artpop” цомгоо гаргаснаас дөнгөж хоёр сарын дараа “Cheek to Cheek” хэмээх сонгодог жазз диск гаргахаа амлажээ. Үүнийгээ тэрбээр Америкийн поп хөгжмийн домог болсон 87 настай Тони Беннеттэй хамтарч хийх гэнэ.
“Windows XP” үйлдлийн систем тэтгэвэртээ гарна
Энэ оны дөрөвдүгээр сарын 8-наас хойш “Windows XP” үйлдлийн систем тэтгэвэртээ гарах нь ээ. Мэдээж та энэ системийг ашиглаж болох ч компьютерээ халдлага, вирусээс хамгаалж чадахгүй болно гэсэн үг. Тиймээс “Windows 8.1” үйлдлийн системийг ашиглахаас өөр аргагүй.
“Google Glass” худалдаанд нэвтэрнэ
Сергей Бриний энэхүү гайхамшигт технологийг хэрэглэх боломж хүн бүрт бүрдэж байна. Компьютер нүдний шил ирэх хавар буюу тавдугаар сард худалдаанд гарснаар агаарын температур, хөдөлгөөнт GPS, хөтөч зэрэг үйлчилгээг зэрэг авах боломжтой.
“Apple”-ийн шинэ бүтээлүүд
2014 оны намар тус компани хэд хэдэн шинэ бүтээлээ танилцуулна хэмээн амлаж байна. Тухайлбал “iMac” ширээний компьютерийн хэмнэлттэй загвар, “iPad” ухаалаг гар утасны шинэ дэлгэц, 12 инчийн хэмжээтэй анхны “MacBook” зэргийг дурьдаж болно.
Түүнчлэн “Apple” компани том дэлгэцтэй “iPhone”, зурагт, ухаалаг цаг зэрэг дээр ажиллаж байгаа сурагтай.
