Үндсэн хуулийн Цэцийн гишүүн Д.Сугарыг тойрсон ээлжит сенсаци дэгдлээ гэж амтай бүхэн ярьж байна.
Бас юун сенсаци вэ, ямар асуудал гараад ирэв гэж ихэнх нь гайхаж байх юм.
Төрийн өмчийн хорооны даргаар 2006 онд томилогдсон цагаасаа эхлэн хэвлэлийнхний овоо хараанд өртөж олны танил болсон эрхэм бол яах аргагүй Д.Сугар хэмээх 60 эргэм насны төрийн хар хүн. Уг нь түүний ажилласан байдал хашсан албан тушаалаас харахад үнэхээр л төрийн хар хүн гэмээр. Гэтэл түүнийг өдгөө ийн нэрлэхээсээ илүү луйварчин, туйварчин гэх хандлага нийгэмд бий болох янзтай.
Энэ эрхэм 2006 оны арванхоёрдугаар сард Асгатын ордыг оросуудад өгөх гэж гэрээг өөрчилсөн, дараа энд тэнд элдэв зүйлд ээлж дараатай юм шиг холбогдсоор Төмөр зам, ГОК зэрэг газруудтай холбоотой хэрэгт орооцолдож байсан ч ёстой л уснаас хуурай гарна гэгчээр ямар ч асуудалгүй цэвэр үлддэж байсан. Дээрх байгууллагуудтай холбоотой хэрэг нь намжаад байтал одоо бас л түүнийг тойрсон сенсаци дэгдэж ямар хэрэг шийдэгдэх дээрээ тулж орхив доо.
Уг нь хүний мууд дурладаг зарим нэгэн этгээдүүдийн хэлсэнчлэн тэрбээр эх орныхоо нэгээхэн хэсгийг худалдах гэсэн тийм увайгүй этгээд бишсэн.
Тэрбээр соц нийгмийн үед ЗХУ-д хуульч мэргэжил эзэмшиж төрийн албаны ажилтан болох гараагаа 1981 онд Сэлэнгэ аймгийн захиргааны хэлтсийн даргаас эхэлсэн байдаг.
Цаг үргэлж ажилдаа өргөжин дэвжиж албан тушаал ахисаар 20 гаруй жилийг үдсэн Д.Сугар дарга өдгөө Үндсэн хуулийн Цэцийн гишүүн хэмээх албан тушаалыг хашиж байгаа.
Ээлжит сенсациудад түүний бүрэн эрхийг түдгэлзүүлж байж шалгах тухай хоёр удаа хүсэлт хүргүүлсэн ч одоогоор хариу ирүүлээгүй байгаа юм.