Өглөө.мн Шинэ өглөө, Шинэ мэдээлэл
Алдарт дуучин Женнифер Лопес өөрийн туулж өнгөрүүлсэн амьдрал, гэр бүлийн хүмүүжлийнхээ талаар дурсан ярьжээ. Түүний дурсамжаас та бүхэнд хүргэж байна.
“Энд нэг удаа ирэхдээ би гэрээ олоогүй юм” хэмээн Женнифер Лопес Бронксын явган хүний гудамжаар эргэхдээ хэлэв.
Намрын нарлаг өдөр. Үд дундын үе байсан болохоор тэрбээр улиралдаа тохируулан хурц ягаан өнгийн спорт хүрэм, гялтганадаг шүрээр битүү чимэглэсэн платформ ултай кет өмсчээ. Түүний бие хааг үнэхээр биширмээр. Жижигхэн хэрнээ хүчирхэг, гоолиг бие, өргөн ташаа гээд л. Женнифер төмөр хашаатай хоёр давхар цагаан байшингийн өмнө зогссоноо “Энд л би өссөн дөө” гэж байлаа. Энэ байшин хорооллын бусад байшингаас нэг талаараа цэцэрлэгт хүрээлэн, нөгөө талаараа хоосон зайгаар тусгаарлагдсан байх аж. Гудамжны дунд хэсэгт дуучин бүсгүйг хүндэтгэн “Raising Star School” хэмээх логотой баннер байрлуулжээ.
Лопес эцэг эх, эгч, дүүтэй хамт амьдарч байсан багынхаа гэрийг ширтэнгээ “Би энэ сургуульд явдаггүй байсан” гэснээ сул талбай руу харсан цонхыг заан “Энд би найз бандиа хүлээдэг байсан. Тэр гудамж тойроод гарч ирэнгүүт л би хаалганы дэргэд дэгдээд оччихдог байж билээ” хэмээн инээв. “Би гурван охинтой айлын дундах нь. Эгч дүү гурав хамтдаа нэг өрөөнд байдаг байсан. Би бүжиг, спортод дуртай. Тиймээс гүйлтийн тэмцээнд оролцдог, ер бусын тэвчээртэй нэгэн байлаа. Ер нь би бурхнаас заяасан марафон гүйгч шиг байгаа юм” хэмээн дахиад л инээв.
Түүний менежер Бенни Медина гэрээс сургууль хүртэлх замыг ширтэнгээ “Та үүгээр хичээлдээ гүйдэг байв уу” гэтэл “Үгүй ээ. Энүүгээр би хичээлээсээ зугтдаг байсан” хэмээн хөхөрлөө. Харин Медина эцгийнх нь гэрт орохыг санал болготол Женнифер гэнэт чимээгүй болов. “Үгүй ээ. Би дотор нь ормооргүй байна. Хамгийн сүүлд би энд аав ээжийнхээ хүсэлтээр ирж байсан. Тэр үед тэд 33 жил хамт амьдарчихаад салах шийдвэр гаргаж билээ. Магадгүй тийм болохоор өнөөдөр миний сэтгэл санаа тиймхэн байгаа биз. Өнгөрсөн үед тохиосон чухал зүйлтэйгээ учирсан хэн бүхэнд ийм байдаг болов уу. Тэр нь аз жаргал, эсвэл зовлон гуниг аль нь ч байж болно шүү дээ” гэв.
Женнифер Лопес энэ гэрээс 18-тайдаа явжээ. Бүжгээр амжилт олно хэмээн мөрөөдсөн тэрбээр “Ballet Hispanico” студи, “Kips Bay Boys and Girls” клубт суралцахаар гэрээсээ гарсан гэдэг. “Би ээжтэйгээ удаан хугацаанд таарамжгүй байсан. Би коллежид орохыг хүсээгүй, харин бүжиглэхийн бөөн хүслэн болдог байлаа. Тиймээс ч гэрээсээ явсан даа. Балетын студийн жижигхэн буйдан миний хоноглох газар болж байв. Тэнд би орон гэргүй хүн шиг амьдарч байсан ч ингэх хэрэгтэй гэж ээждээ итгүүлсэн. Хэдхэн сарын дараа Европт ажил олж, буцаж ирээд “In Living Color” шоуны дүр хүлээн авсан. Би “The Fly Girls”-ын бүжгийн хамтлагийн охин гэдгээрээ алдаршиж, Лос-Анжелес рүү шилжсэн дээ. Энэ бол ердөө нэг л жилийн дотор болсон үйл явдал” хэмээн ярив.
Лопес Бронкс хотоо маш их санадаг байсан гэдэг. “Би Сахиусан тэнгэрүүдийн хотыг үзэн яддаг байлаа. Тийм ч учраас “Хаанаас сүү авах юм бэ. Энэ гудамжаар л хүмүүс хөлхөөд байдаг хэрэг үү” гээд л дургүйцдэг байсан. Харин одоо бол Лос-Анжелес хот Бронкс шиг надад эрч хүч хайрладаггүй ч өөрийн эрхгүй хайртай болжээ. Юутай ч би Нью-Йоркт байдаг энэ гэрээс эрч хүчээ олж авсан юм шүү дээ” хэмээн учирлалаа.
Бас тэрбээр ажиллаж, хөдөлмөрлөх дадлыг ч эндээс л олж авсан. Тэр зогсоо зайгүй ажиллаад хэдийнэ дасчээ. Үүний хажуугаар Лопес ээжийнхээ үүргийг ч умартдаггүй. Ихрүүд нь түүнийг хаа ч явсан цуг дагана. “Би хөвгүүдээ ажил хөдөлмөрт яаж сургах вэ гэж удаан бодсон. Тэгээд хүүхдүүд аливаа сургаалыг чихнийхээ хажуугаар өнгөрөөдөг болохоор эцэг, эхийн хувьд үлгэр жишээ үзүүлэх нь дээр юм байна гэдгийг ойлгосон. Миний аав бүтэн өдөржин ажилладаг байсан болохоор бидэнд халамж анхаарал ч тавьж чаддаггүй байсан. Ээж маань “Tupperware”-д ажиллахын хажуугаар сургуульд ажиллаж мөнгө олдог байсан юм. Би тэдэнд саад болох эрхгүй болохоор хар багаасаа л хатуу зарчимч болж өссөн” гэж байлаа.
Бронкс хот ч Женниферийг алдартай хүний этгээд төсөөлөлтэй болгож чаджээ. Тэрбээр хааяа нэг дуулиан шуугианд холбогддог бөгөөд үүнийгээ олны танил байхын нэг хэлбэр гэж үздэг. Лопес “Паффи” хэмээх Шон Комбс, Бен Аффлек, Марк Энтони нарын ододтой хайр дурлалын харилцаа үүсгэж байснаас гадна улаан хивсэн дээгүүр олны нүдийг хужирладгаараа алдартай.
Үүнээс хамгийн тод үлдсэн нь 2000 оны “Грэмми”-ийн ёслолд тэрбээр хөтлөгчөөр оролцсон явдал юм. Тэрбээр “Versace”-ийн гэрэлтдэг материалаар хийсэн, цээжнээсээ хүйсээ хүртэл ил гарсан, гуя хүртэл оноотой даашинзтай гарч ирсэн билээ. Энэ талаараа Жей-Ло “Би олон даашинз үзсэн боловч нэг нь ч таалагдаагүй. Гэтэл миний стилист нэг даашинз нөөцөлсөн, өмнө нь нэг хүн өмсөж байсан гэж хэлсэн юм. Тэгээд л өмсөж үзээд тэр даашинзтай гарахаар шийдсэн. Гэхдээ энэ даашинзыг хүмүүс тэгж хүлээж авна гэж огт бодоогүй. Тэр үед тайзнаа дэлхийд алдартай Дэвид Духовнытой гарч ирэхэд тэр “Удаан хүлээсний эцэст намайг хэн ч харахгүй нь ээ” гэж мэдэгдэж байсан удаатай.
Тэр үед заал даяар хашхиралдаж байлаа. Би байрандаа очсоныхоо дараа хүмүүсээс “Юу нь болохоо байв аа” гэж асуусан. Тэгсэн чинь Паффи, Бенни хоёр “Та энэ даашинзтайгаа зургаа авахуулах хэрэгтэй” гэж билээ” хэмээн инээмсэглэв. Үнэхээр ч тэр энэ даашинзтайгаа зургаа авахуулсан юм.
Америкчууд чамин тансаг хэрнээ бодит мэт байдалд дуртай. Жей-Ло ч үүний тэнцвэрийг сайн баримталдаг. Тэрбээр хөлсөө гартал хөдөлмөрлөдөг ч кетэндээ гялтганадаг шигтгээ хатгаж, гангарахаа хэзээ ч мартдаггүй. Лопес өссөн гэрийнхээ цонхыг ширтэнгээ “Унтлагын өрөөний толиндоо хараад дуулж, бүжиглэж байснаа мартдаггүй юм. Тэр үед үргэлж өсч том болохыг мөрөөддөг байв.
Харин одоо би Беннитэй хамтарч ирэх хагас жил, жилийнхээ төлөвлөгөөг гаргадаг. Тэр ч намайг цыганы амьдралаар амьдарч, нүүдэллэх дуртайг мэднэ. Амралтын өдрүүд надад хэтэрхий урт санагддаг юм. Хоёр долоо хоног амарлаа л бол “Ажлаа хийе дээ” гэдэг хүн дээ, би. Үргэлж л ийм байсан” хэмээв.
Тэрбээр гэрээсээ гараад л мөрөөддөг байсан одынхоо дүрд хувирдаг. Түүн шиг цагийн дараа л гэхэд булган дээл, өсгийтэй лакан гутлаараа гангарч, үсээ задгай тавин алхана. Харин одоо тэрбээр төрж өссөн гэрээ харан зогсож байна. Энд өдгөө хоёр жаахан хүүхэд хашаан дотроо гүйлдэх аж. Лопес ч тэдэн рүү харан инээмсэглэнэ. Энэ инээмсэглэл бол “Би яг л та нар шиг байсан. Харин одоо би бол би” хэмээж буйг илтгэх аж.
