Зарим албан хаагч цол нэмлээ

Тулгар төрийн 2224, Их Монгол Улс байгуулагдсаны 809, Ардын хувьсгалын 94 жилийн ойн Үндэсний их баяр наадмыг тохиолдуулан батлан хамгаалах салбарт бусдыгаа түүчээлэн ажиллаж байгаа зарим алба хаагчдад хугацааны цол олголоо. Алба хаагчдын цолыг Батлан хамгаалахын сайд Ц.Цолмон гардуулан өгсөн юм. Албан тушаалын зэрэглэлийн дэд хурандаа цолыг БХЯ-ны Стратегийн бодлого, төлөвлөлтийн газрын ахлах мэргэжилтэн, хошууч С.Ванчинхүү, БХИС-ийн багш, хошууч Д.Баттүвшин, Энхийг дэмжих ажиллагааны тэнхимийн багш, хошууч Н.Лхагвасүрэн нарын таван хүнд олгов. Албан тушаалын зэрэглэлийн хошууч цолоор БХЯ-ны Төрийн захиргааны удирдлагын газрын хууль, тогтоомж, шийдвэрийн хэрэгжилт хариуцсан мэргэжилтэн, нууцын дарга, ахмад О.Ууганбаяр, Бодлогын хэрэгжилтийг зохицуулах газрын мэргэжилтэн, ахмад Д.Зоригтсайхан, Говь-Алтай аймгийн Засаг даргын Тамгын газрын Цэргийн штабын офицер, ахмад Г.Цэдэв нарын зургаан хүнд олголоо. Харин ахмад цолыг БХЯ-ны Төрийн захиргааны удирдлагын газрын ахлах мэргэжилтэн, ахлах дэслэгч Б.Энхтөвшин нарын гурван хүнд олгосон юм. Ахлах дэслэгч цолыг Дархан-Уул аймгийн Засаг даргын Тамгын газрын Цэргийн штабын офицер, дэслэгч Б.Оргилсайханд, спортод гаргасан амжилтыг үнэлж БХЯ-ны Бодлогын хэрэгжилтийг зохицуулах газрын мэргэжилтэн, дэслэгч Г.Тунгалаг нарт олгов. Сургагч ахлагч цолыг БХИС-ийн ахлах ахлагч Д.Цэгмид нарын гурван хүнийг шагнасан юм. Батлан хамгаалахын сайд Ц.Цолмон цол нэмсэн алба хаагчдад хандаж “Юуны өмнө эрхэлсэн ажилдаа хариуцлага, үр бүтээлтэй байж цол нэмж байгаад тань баяр хүргэе. Цол нэмэхийн хажуугаар хариуцлага нэмэгдэж байгааг ойлгох хэрэгтэй. Эх орноо батлан хамгаалах их үйлсэд тань амжилт хүсье” гэсэн юм.