Өглөө.мн Шинэ өглөө, Шинэ мэдээлэл
Монгол Улсын Ерөнхийлөгчийн Тамгын газрын нэрэмжит цомын төлөөх танхимын хөлбөмбөг /футзал/-ын тэмцээн 2016 оны 11 дүгээр сарын 12-ны өдөр Монголын хөлбөмбөгийн холбооны зааланд зохион байгуулагдаж, амжилттай өндөрлөлөө.
Монгол Улсын Ерөнхийлөгчийн 2015 оны 8 дугаар сарын 15-ны өдрийн Багийн спортыг хөгжүүлэхэд чиглэсэн 114 дүгээр зарлигийг хэрэгжүүлэх зорилгоор төрийн албан хаагчдын эрүүл мэндийг хамгаалах, бие бялдраа хөгжүүлэх, биеийн тамир, спортоор хичээллэгсдийн тоог нэмэгдүүлэх, төрийн байгууллагуудын хамтын ажиллагааг өргөжүүлэх боломжийг дэмжих зорилгоор Ерөнхийлөгчийн Тамгын газрын нэрэмжит цомын төлөөх танхимын хөлбөмбөгийн тэмцээнийг өнгөрсөн 2015 оноос зохион байгуулж эхэлсэн байна.
Хоёр дахь удаагаа зохион байгуулагдсан тус тэмцээнд төрийн бодлого боловсруулдаг, хэрэгжүүлдэг яам, тамгын газруудын эрэгтэй 9, эмэгтэй 7 баг тамирчид оролцсоноос УИХ-ын Тамгын газрын эрэгтэй, эмэгтэй баг тус бүр алтан медаль хүртэж, багаараа тэргүүн байр эзлэн алтан цомын эзэд болцгоов хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
