Хүйтний харшлаас хэрхэн сэргийлэх вэ?

Хүйтний харшлаас хэрхэн сэргийлэх зөвлөгөөг ЭХЭМҮТ-өөс бэлтгэснийг хүргэж байна.

Шинж тэмдэг: Нүүр, шилбэ, гарын шуу, сарвуун дээр хүйтний аллергийн шинж тэмдэг хамгийн хүчтэй илэрдэг. Жирийн үед хүйтэн агаар байж байгаад дулаан байранд орох үед агшсан судаснууд тэлснээс хүний арьс улайж бага зэрэг загатнадаг ч 20-30 минутын дараа арилдаг. Харин харшилтай үед загатнах нь хүчтэй бөгөөд илүү удаан үргэлжилдэг. Харшил өгснийг илтгэх өөр нэг шинж нь нүд, уруул орчим хавагнах.

ХҮЙТНИЙ ХАРШИЛ НЬ ОЛОН ХЭЛБЭРЭЭР ИЛЭРДЭГ

Хүйтний харшлын үед арьсан дээр ягаан, цайвардуу өнгөтэй тууралт, гүвдрүү гарч маш хүчтэй загатнуулахаас гадна хавагнана. Халгайнд түлэгдсэнтэй адил шинж тэмдэг илэрнэ гэсэн үг.

Зарим тохиолдолд хүйтний харшилтай хүн аяга хүйтэн ус уусны дараа хэл, залгиур нь хавагнаж, гэдэс нь өвддөг. Хүйтэн, чийг хоёр хосолсон үед харшлын илрэл нь бүр ч хүчтэй.Нүүр, сарвуу, шилбэ, гуяны дотор тал хамгийн их өртдөг. Энэ үед хуурай, дулаан байр, хуурай хувцас, халуун цай, антигистамины эсрэг үйлчилгээтэй эмүүд /Харшлын эмчид үзүүлээд зөвхөн эмчийн бичиж өгсөн жорын дагуу./ туслана. Дулаан хувцаслах хэрэгтэй. Синтетик материалан хувцас харшлын илрэлийг хүчтэй болгодог.
Хүйтэний харшлын үед цөөнгүй тохиолдолд нусгайтна. Хүйтэн агаарын нөлөөгөөр ингэдэг. Иймд цэгэн иллэг, дулаан газар л тус болно.

Нүдний салст бүрхэвчийн үрэвсэлийн шинж тэмдэг ч бас илэрдэг. Нүд улайж, нулимс гарч, загатнуулна. Дулаан газар орохоор эдгээр шинж тэмдэг нь арилдаг.
Толгой таллаж өвдөх. Хүйтний гаралтай толгой өвдөлтөөс сэргийлэхийн тулд толгой нүцгэн явахаас зайлсхий. Хүйтэнд хүйтэн ундаа уух, зайрмаг энэ тэр идэх хэрэггүй. Хүйтний гаралтай толгой өвдөлт нь дулаан газар ормогц аяндаа арилна.

Хүйтний гаралтай толгой өвдөлт нь дулаан газар ормогц аяндаа арилна.

 

Нуруугаар хатгуулах. Хүйтний нөлөөгөөр мэдрэлийн ёзоор үрэвсэх үед нуруугаар хатгуулж өвддөг, үүснэ. Сайн дулаалаагүйгээс даарч, нуруу өвдсөн бол халуун цай, халуун устай ваннд орох, халуун оргиулдаг тос түрхэж болно.

Амьсгаа боох. Хүйтний нөлөөгөөр амьсгалын зам огцом агшидаг. Дулаан газар ормогц аяндаа арилна. Гадаа явахдаа ам, хамраа ороолт, бээлийгээрээ дарж зөвхөн хамраараа амьсгалах хэрэгтэй.

Хүйтний аллерги нь астм /астма / буюу багтраа зэрэг бусад харшилтай хавсрах нь цөөнгүй.

ЭМЧИЛГЭЭ

Хүйтэнд дасна гэж байдаггүй болохоор хүйтний харшилтай хүн сэрүүн улиралд гадаа гарахдаа аль болох дулаан хувцаслаж байх ёстой. Гадагш гарахаас хагас цагийн өмнөөс чийгшүүлэх нөлөөгүй хамгаалах тос түрхэж өгөх хэрэгтэй. Хоолондоо ханаагүй тослог хүчил омега -3 ихээр агуулсан оливийн, эрдэнэ шишийн, рапсын тос, тослог өндөртэй загасны мах зэргийг түлхүү оруул. Мөн А, С, Е, PP амин дэм ууна. Хоолыг зөвхөн халуунд нь идэж байх хэрэгтэй. Гадаа гарахынхаа өмнө халуун цай ууж байх хэрэгтэй.

Хүйтэн нь харшлаас гадна хүйтний гаралтай арьстасын шалтгаан болдог. Ийм үед нүүр, чих, гарын сарвуу зэрэг хүйтэн хамгийн их өртдөг газрын арьсны тэжээл нь алдагдаж хүрэн улаан өнгөтэй загатнуулж холцруутсан толбо үүсдэг бөгөөд арьс хуурайшина. Заримдаа арьстас нь гуя, өвдөгний дотор тал гэсэн хүйтэн нэн мэдрэмтгий хэсгүүдэд үүсдэг. Энэ үед захын цусан хангамж сайжруулах эм, А, С, Е, PP амин дэм хэрэглэдэг. Дахин даарч, хөрөхөөс сэргийлж чадсан үед хүйтний гаралтай арьстасыг 2 долоо хоногийн дотор эмчлэх боломжтой гэж үздэг байна.

Халбаганы 1/3 хүнсний содыг стакан бүлээн усанд уусгаад арьсаа арчвал загатнах нь бага байна. Мөн зуун настын шүүс, ментолын уусмал, Е витамины уусмалаар арчвал загатнах нь багасна.

Аливаа харшлын эмгэгүүд үүн дотроос хүйтний харшил нь дархлаа тогтолцооны тэнцвэрт үйл ажиллагаа алдагдсан буюу дархлааны хэт мэдрэгших урвалаас шалтгаалдаг.
Хүйтний харшлын үед дархлаа тогтолцоог тэнцвэржүүлэх зайлшгүй шаардлагатай.