Монгол Улсын хоёр уран бүтээл Бусаны олон улсын кино наадамд шалгарлаа

28 дахь удаагийн Бусаны Олон Улсын Кино наадмын /BIFF/ албан ёсны мэдээ өчигдөр  зарлагдлаа.

Азийн орнуудад зохиогддог кино наадмууд дундаа А зэрэглэлийн наадам болох “Бусаны Олон Улсын Кино Наадам” нь 70 гаруй орны 200 орчим кино бүтээлүүдийг сонгон шалгаруулж 14 хэсэгт нэр дэвшүүлдэг билээ. Уг кино наадам нь 2023 оны 10 сарын 4-13-ны өдрийн хооронд зохион байгуулагдах юм.

Энэхүү наадамд Монгол улсаас Найруулагч П.Золжаргалын “Баавгай Болохсон” /If Only I Could Hibernate/ уран сайхны кино, Найруулагч П.Лхагвадуламын “Сэр Сэр Салхи” /Сity Of Wind/ уран сайхны кино “A WINDOW ON ASIAN CINEMA” хэсэгт албан ёсоор шалгарч, өрсөлдөх эрхээ авлаа. Тус уралдаант хэсэгт 16 орны бүтээсэн 30 уран бүтээл шалгарчээ.

Найруулагч П.Лхагвадуламын “Сэр Сэр Салхи” /Сity Of Wind/ уран сайхны кино нь 08-р сарын 30-09-р сарын 11-ний хооронд зохион байгуулагдаж буй 80 дахь удаагийн Венецийн Олон улсын кино наадамд “ORRIZONTI” хэсэгт шалгаран Олон улсад нээлтээ хийсэн юм.

Тус уран сайхны кино нь Бүгд Найрамдах Франц Улсын “Аврора фильмс”, Монгол Улсын “Гуру медиа” компанийн хамтарсан төсөл бөгөөд “КИНО УРЛАГИЙН ДЭМЖИХ САН”-аас 2022 онд зарлагдсан анхны төслийн сонгон шалгаруулалтаар дэмжигдэн, тодорхой хэсэгт санхүүгийн дэмжлэг авсан 11 төслийн нэг билээ.

Харин найруулагч П.Золжаргалын “Баавгай Болохсон” /If Only I Could Hibernate/ УСК нь энэ 05 дугаар сард зохион байгуулагдсан 76 дахь удаагийн Каннын Олон улсын кино наадмын “UN CERTAIN REGARD” төрөлд албан ёсоор нэр дэвшиж, олон улсад нээлтээ хийсэн байдаг.  Монголын Үндэсний Кино урлагийн зөвлөлөөс тус УСК-ны уран бүтээлчдийг кино наадамд оролцоход дэмжин ажиллаж байсан удаатай.