Өглөө.мн Шинэ өглөө, Шинэ мэдээлэл
Сүхбаатар аймгаас Улаанбаатарыг зорьж явсан “Дайчин сүх” ХХК-ийн 05-22 СҮА улсын дугаартай автобус Төв аймгийн Эрдэнэ сумын нутаг Баяндаваагийн зам буюу Цонжин болдогийн ойролцоо өнгөрсөн зургаадугаар сард осолдсон юм. Жолооч Содномдаржаагийн Болдбаатар нь Хьюндай Аэробус маркийн автомашиныг жолоодож явахдаа тээврийн хэрэгслийн хөдөлгөөний аюулгүй байдлын журам болох Монгол Улсын Замын хөдөлгөөний дүрмийн 9.1-д заасан “Жолооч хөдөлгөөний эрчим, тээврийн хэрэгслийн онцлог байдал, тээж яваа ачаа, замын болон цаг агаарын нөхцөл, хөдөлгөөний дагуу үзэгдэлтийг харгалзан тээврийн хэрэгслийн хурдыг энэ дүрэмд тогтоосон хязгаараас хэтрүүлэхгүйгээр сонгож явна” гэсэн заалтыг зөрчсөний улмаас зам тээврийн осол гаргажээ.
Ослын улмаас 7 хүний амь нас хохирч, 9 хүний биед хүнд зэргийн гэмтэл, -13 хүний биед хүндэвтэр зэргийн гэмтэл авч 15 хүний биед хөнгөн зэргийн гэмтэл учирсан ба “Дайчинсүх” ХХК-ний эзэмшлийн 05-22 СҮА улсын дугаартай Хьюндай Аэробус маркийн автомашинд 36.440.000 төгрөгийн шууд хохирол буюу их хэмжээний хохирол тус тус учирсан байна.
Уг хэргийг Тээврийн прокурорын газраас яллах дүгнэлт үйлдэн шүүхэд шилжүүлсэнийг Дүүргийн Эрүүгийн хэргийн Анхан шатны 2 дугаар шүүх хянан хэлэлцээд шүүгдэгч Б-т ЭХТАийн 215-р зүйлийн 215.4-д зааснаар 9 жилийн хорих ялыг чанга дэглэмтэй хорих ангид эдлүүлэхээр шийдвэрлэжээ.
