Д.Доржпүрэв: Төв аймагт зуун дамнан яригдсан ч хийгдэж чадаагүй бүтээн байгуулалтуудыг Ардчилагчид хийж чадлаа

Ардчилсан нам байгуулагдсаны 26 жилийн ой улс орон даяар 4-дүгээр сарын 7-ны өдөр болж өнгөрлөө. Энэ өдөр Төв аймгийнхны хувьд өнгөрсөн дөрвөн жилийн хугацаанд орон нутагтаа хийж хэрэгжүүлсэн  бүтээн байгуулалтын ажлаа тайлагнасан, намын алдартануудаа шагнаж урамшуулсан, ирэх жилүүдэд хийж бүтээх ажлаа хэлэлцсэн ажил хэрэгч хүрээнд тэмдэглэн өнгөрүүллээ. Энэ үеэр баярын хурлыг нээж  Төв аймгийн АН-ын дарга Д.Доржпүрэвийн АН-ын 26 жилийн ойн баярын хуралд хэлсэн үгийг хүргэж байна

Эрхэм   журмын нөхөд өө

Эрхэмсэг хадагтай ноёд оо

Ардчиллын үйл хэргийн  төлөө сэтгэл зүрхээ зориулан дэмждэг гишүүд дэмжигчид,  нутгийн зон олон ах дүүс ээ

Та бүхэндээ Ардчилсан Монгол улс,   Ардчилсан нам байгуулагдсаны 26 жилийн ойн баярын мэнд хүргэе.

Тэртээх цагаан морин жил эхлүүлсэн Монголын ардчилал бол улстөр, эдийн засаг, нийгмийн хувьд нэгэн зэрэг шилжилт хийсэн хамгийн зоримог хамгийн шинэлэг хувьсгал байсан юм.

Энэхүү хувьсгалд Төв аймгийн шинийг эрэлхийлэгч залуучууд ч бас нэгдэж төрлөх нутаг, түмэн олныхоо хөгжил дэвшил, эрх чөлөө, ирээдүйн сайн сайхны баталгааг хангах хоёргүй сэтгэлийн зүтгэлээр өнөөдрийн ялалт бидэнд ирсэн юм.

Тиймээс энэхүү үйл хэргийн төлөө, өнөөдрийн ялалт амжилтын төлөө сэтгэл зүрх, үйл хэрэг, залуу нас, ажил амьдралаа зориулсан ахмад гишүүд, үе үед хамтран зүтгэж, дэмжин ирсэн гишүүд дэмжигчид та бүхэндээ чин сэтгэлийн талархал илэрхийлье.

Амжилт ололт, алдаа оноо, сургамжтай, ахмад үеийнхний ажил амьдрал, амь насаараа дэнчин тавьж босгосон ардчилсан хувьсгалын 26 жилийн түүхийг бид мартах ёсгүй.

1989 онд ардчиллын үрийг аймагтаа анх тарьсан, улстөрийн хүчин холбоодыг үүсгэн байгуулалцсан, 1990 оны өлсгөлөнд оролцож явсан ахмад партизанууд болох Баттөгс, Төрбат, Болдбаатар, Ганбаатар, Нэргүй, Эрдэнэбаатар Дамдин, Бямбажав Алтангэрэл, Нямдорж, Хүрэлбаатар, Ганхуяг, Дашрэнцэн, Батчулуун, Дунхорол, Сономцэрэн, Дарьсүрэн, Отгонбаяр, До.Ганболд гээд олон сайхан ахмадууд болон үе үеийн намын дарга нар, тухайн үеийн баг хамт олноо хүндэтгэн алдаршуулья.

Ардчиллын түүх бол монголчуудын, бас бидний амьдралын түүх юм.  1990 онд Төв аймагт Социал демократ нам, МҮАН, МҮДН-ыг аймагтаа салбарлан байгуулж тухайн үеийн анхны Социал демократ намын даргаар Төрбат, МҮАН-ын даргаар Х.Баттөгс, МҮДН-ын даргаар Болдбаатар нар маань ажиллаж анхны гишүүд дэмжигчдийг бүртгэн сум бүрт салбар хороогоо байгуулж ардчиллын үйл хэрэг үзэл санааг ухуулан таниулж  эхэлсэн түүхтэй.

Улмаар 1992 онд гурван нам нэгдэж МҮАН-ыг байгуулахад нийт гишүүдийн олонхийн саналаар М.Хүрэлбаатар анхны даргаар сонгогдон ажиллаж, 1993 оны Ерөнхийлөгчийн сонгуулиар нийт 24 суманд ялалт байгуулж анхны Ардчилсан Ерөнхийлөгч П.Очирбатыг нутгаасаа ялуулан Төв аймгийнхан ардчиллын үйл хэргийг тууштай дэмжигчид болохоо батлан харуулж чадсан гавьяаг өнөөдөр бас эргэн дурсая.

1995 онд сонгуулийн өмнө намын гишүүдийн нийт олонхийн саналаар Дашрэнцэн агсан маань намын даргаар сонгогдон багаа удирдаж 1996-2000 оны УИХ-ын сонгуульд амжилттай оролцсоноор Ө.Наранцэцэг, До.Ганболд нар УИХ-д гишүүнээр сонгогдон, орон нутгийн сонгуульд Аймгийн ИХ-д 40 гаруй хувийн амжилт үзүүлсэн гавьяаг хүндэтгэн дурсаж Дашрэнцэн агсандаа энэ мөчид хүндэтгэл үзүүлье……..

 2000 оны 12 сарын 6-нд  До.Ганболд даргын үед 5 нам нэгдэн нийлж өнөөдрийн АН-ыг байгуулж байсан бол 2000-2004 оны УИХ-ын сонгуульд суудлаа алдаж, орон нутгийн сонгуульд аймгийн ИХ-д 5-н суудал, 2004 онд 10 суудалтай болсон гашуун түүх бас бий.

2006-2008 онд  ажилласан М.Отгонбаяр, Нямдорж дарга нарын үед орон нутгийн сонгуульд аймгийн ИХуралд 12 суудал авч суудлаа ахиулсан нь бага боловч амжилт байлаа.

2008 оны орон нутгийн сонгуулийн дараа миний бие журмын нөхдийн итгэлийг хүлээж Төв аймгийн АН-ын даргаар сонгогдсоноор 2012 оны УИХ-ын сонгуульд удаа дараалан аман хүзүүдсэн ч, орон нутгийн сонгуульд анх удаа “Итгэл- Сэтгэл- Зүтгэл- Ялалт” уриан дор нэгдэн оролцож  Аймгийн ИХ-ын 41 суудлаас 20 суудлыг авч чадсан юм.

Үүний үр дүнд аймгийн ИХ-ын дарга, засаг дарга, засаг даргын орлогч болон хэлтэс агентлагийн дарга нар, мөн сумдад засаг дарга, орлогч, ИХ-ын дарга нарыг тохоон томилуулах эрх мэдэл, хийж бүтээх ажлын эхлэл тавигдсан билээ.

Энэ бол үе үеийн дарга нар, намын удирдлагууд, журмын нөхөд, гишүүд дэмжигчдийн маань сэтгэл, зүтгэлийн үндэс,  тэндээс цэцэглэсэн өнөөдрийн гишүүд дэмжигчдийн хичээл зүтгэлийн үр байсан гэдгийг  энд  хэлэх нь зүйтэй юм.

Ардчилсан хувьсгалын 26-н жилийн түүхэнд бидэнд бахархам амжилтууд байсан ч алдаа оноо, сургамж бас байсныг мартах ёсгүй ээ.

Тухайлбал тэртээх 1989, 1990 онд эхлүүлсэн ардчиллын үйл хэрэг, сэтгэл, зүтгэл чиг зорилгоосоо зарим талаараа хазайж, намын удирдах болон сонгуульт албан тушаалтнуудын эрх ашгийн наймаа болж хувирсан, намын эв нэгдэл алдагдсаныг ахмад гишүүд маань шүүмжлэн сануулж байна.

Үүний хор уршгаар ч орон нутагт ялалт байгуулах боломжуудаа удаа дараа алдаж байсан гашуун туршлага байсныг анхааруулж байгааг бид мартах учиргүй.

Тиймээс бид 2008 оноос хойш намын эв нэгдэл, багийн хамтын ажиллагааг  эрхэм болгож Төв аймгийнхаа хөгжил дэвшлийн төлөө өөрсдийн мөрийн хөтөлбөрөө боловсруулан амжилттай ажилласны үр дүнд өнөөдрийн ялалтыг авчирч чадсан юм. Түүгээр ч барахгүй орон нутагтаа томоохон бүтээн байгуулалтуудыг бий болгож, аймгийнхаа урт хугацааны хөгжлийн суурь үндсүүдийг эхлүүлж, бас хэрэгжүүлж чадлаа.

Бид нэг сонгуулиас нөгөө сонгуулийн хооронд биш, Төв аймгийнхаа хөгжлийн урт хугацааны хөтөлбөрийг боловсруулан ажиллахдаа ахмад үеээ алагчлалгүй, дунд үеийнхнээ орхилгүй, залуу үеээ гололгүй хамтдаа зүтгэж, хамтдаа хичээсний үр шим өнөөдөр гарч байна.

Олон арван жилийн турш ярьдаг ч хийж хэрэгжүүлж чадаагүй ажлуудыг бид сэтгэл байвал бүтээдэг,  зүтгэл байвал босгодог, багаараа явбал өөрчилж болдогийг батлан харуулж чадлаа.

Тухайлбал Төв аймгийн Зуун мод хотод 1000 айлын орон сууцны ажлыг Шинэчлэлийн Засгийн газрын  мөрийн хөтөлбөрийн хүрээнд хийж эхлүүлэхдээ  төсвийн хөрөнгийн 3,9 тэрбум төгрөгийн хөрөнгө оруулалтыг шинэ удирдлагуудтайгаа хамтдаа шийдүүлсэн. Ингэснээр 1000 айлын орон сууц, тэр дундаа Ардчиллын хороолол гэж бахархан нэрлэх болсон бүтээн байгуулалтын үндэс суурийг бүрэн бүтэн тавьж өнөөдөр Ардчиллын хороолол эхнээсээ баригдаж эздээ хүлээж аваад байна.

Төв аймаг анх удаа сумдууддаа төвлөрсөн дулаан хангамжийн ажлыг эхлүүлж  амжилттай үргэлжлүүлэн хэрэгжүүлж байна. Мөн түүнчлэн сумдын цахилгаан хангамж хүчдэлийн тогтвортой байдлыг хангах,  хүчдэлийг илүү хэрэгцээт шатанд хүргэх, сумдад үйлдвэрлэл үйлчилгээ явуулах боломжыг бий болгохын төлөө зорьж ажиллаа.

Зуун дамнан яригдсан замын асуудлыг бид бас маш богино хугацаанд шийдэж чадсан. Үүнийг шийдүүлэхдээ миний бие Шинэчлэлийн Засгийн газрын гишүүний хувьд аймгийнхаа шинэ удирдлагуудтай хамтдаа Засгийн газарт уйгагүй нөлөөлөл үзүүлэн ажилласны үр дүнд өнөөдөр Зуунмод хот маань Улаанбаатар хоттой хоёр чиглэлээр хатуу хучилттай шинэ замтай холбогдож чадлаа.

Үүний үр дүнд иргэд маань ая тухтай, аюулгүй амгалан зорчих, эдийн засаг, цаг хугацааны хэмнэлт хийх бүх нөхцөл бололцоог хангаж өгсөн төдийгүй,  цаашдаа Зуун мод хотод үйлдвэр технологийн парк баригдах үндэс суурийг тавьж өгсөн гэж үзэж байна. Энэ суурийг илүү сайн болгох, дэд бүтцийн хөгжлөөрөө тэргүүлэх зэрэгт хүрэхийн тулд манай аймаг Дулааны шинэ станцтай болох ажлыг ч бас Шинэчлэлийн засгийн газрын үед эхлүүлэн өнөөдөр хэрэгжүүлэхээр зорин ажиллаж байгааг дуулгахдаа таатай байна.

Түүнчлэн бидний 2009 онд мөрөөдөн ярьж байсан аймгаа кино театртай болгох хүсэл биеллээ олж Солонго цогцолборыг барьж ашиглалтад оруулснаар хүүхэд залуучуудын амралт чөлөөт цагийг ая тухтай зөв өнгөрөөх боломжийг бас өглөө.

 Эдгээр олон сайхан бүтээн байгуулалтын үр шимийг Төв аймгийнхан маань хүртэж өнөөдөр Ардчиллынхнаараа бахархан баярлаж, улам ихийг хийлгэхээр захиас даалгавраа бэлдэн суугаа гэдэгт би итгэлтэй байна.

Төв аймаг бол Монгол улсын нийгэм эдийн засагт асар их хувь нэмэр оруулдаг, ардчилал шинэчлэлийн түүчээ нь болж, алдар суутнууд бахархам амжилтуудын анхдагчид гэдгээ бататган харуулж амжилт бүтээлээрээ улсдаа тэргүүлэн Сүхбаатарын одонт 2-дох аймаг болж чадсаныг энд дурдахад таатай байна.

Ардчилсан засаглалын үед олон олон жилийн нөр их хөдөлмөр, сэтгэл зүтгэлээ зориулсан Төв аймагчуудын хичээл зүтгэл Сүхбаатарын одонгоор түүчээлэн алдар гавьяатнуудыг ар араас нь төрүүлсэн өнгөрсөн дөрвөн жилийг бид амжилт бүтээлээр дүүрэн үдэж байна.

Бүхэл бүтэн нийгмийг өөрчилж, 26 жилийн өмнөх түүхийг эргэн  таних аргагүй болтол хувьсгал хийж чадсан ардчилагчид билээ бүхэн. Энэ бүх амжилтын эзэд баатрууд болсон та нартаа ахин талархал илэрхийлье.

Ардчилагчид хийж бүтээж чаддаг гэдгийг бид харуулж чадсан ч намын дотоод эв нэгдэл, хамтын ажиллагаа 2016 оны сонгуулийн өмнө хамгийн их тулгамдсан, сорьж шалгасан хүндхэн сэдэв болж байгааг  бид харж байна.

Ийм л үед бид дээрээ төдийгүй дунд шатандаа намын эв нэгдлээ улам бүр эрхэмлэж олсон амжилтаа бататган 2012-оос 2020 он хүртэл дэвшүүлэн тавьсан “Монгол хүн 2020” хөтөлбөрөө үргэлжлүүлэхийн төлөө нэгдэн ажиллах ёстой.

Тэр тусмаа Төв сайхан нутгийн маань түмэн олон нутагтаа эрхэлсэн ажилтай, эрүүл энх, эрх чөлөөтэй, эрдэм мэдлэгтэй, эзний ёсоор амьдрах баталгааг хангах, эдийн засгийн хувьд хүчирхэгжсэн, өрсөлдөх чадвар бүхий, бизнесийн хамгийн таатай орчинтой аймаг болохын төлөө улам их хичээн ажиллах хэрэгтэй байна.

Ард иргэдийнхээ итгэсэн сонголтыг баталгаажуулж, итгэл даасан улстөрийн тулхтай нам байхын тулд, өнгөрсөн хугацаанд хийсэн ажлаа бататгаж, цаашид амласан амлалтаа хэрэгжүүлэхийн тулд бид ахмадуудынхаа сануулгыг ажил болгож, эв нэгдлээ эрхэмлэж, эрх мэдэл албан тушаалын төлөөх наймаалцлыг таслан зогсоож, авсан алба, үүрэгт ажилдаа эзний ёсоор ханддаг, бас хариуцлага хүлээдэг зарчимд анхаарч ажиллах ёстой гэдгийг ч ахин сануулая..

 Дутагдлын хажуугаар дуугүй өнгөрөх нь дутагдлыг улам дэврээх үндэс болдог гэдэг.

Зөвхөн өөрийн эрх ашгийн төлөө бусдын эрх ашгийг хохироох, бусдыг өөрийн ашиг сонирхолд нийцүүлэх гэж шахалт дарамт үзүүлэх нь бидний хүссэн ардчилал бишээ гэдгийг сануулан зарим нэг  алдаа дутагдлаа засч дор бүрнээ хичээн зүтгэж амин хувийн эрх ашгийн төлөө биш аймаг орон нутгийнхаа хөгжил дэвшил, нийтийн эрх ашгийн төлөө ухаан бодлоо уралдуулж, олсон амжилт эрх мэдлээ үүний төлөө зориулаасай гэж хүсч байна.

 Амжилт ялалтын түүчээг үргэлжлүүлэхийн тулд бидэнд олон сорилт шалгуур ээлж дарааллаараа тулгарах нь ойлгомжтой

Амжилтыг ганцаараа бий болгодоггүй, үр дүнг ч ганцаараа хүртэж болдоггүй. Миний, чиний бас бидний хэлсэн үг, хийсэн үйлдлээс ардчиллын ирээдүй ихээхэн хамааралтай гэдгийг бодож тунгаан аливаа асуудлыг олонхиороо шийддэг байх,  олныхоо төлөө гэсэн сэтгэл, зүтгэлтэй байж Төв аймагчуудынхаа өгсөн итгэлийг улам баталгаажуулах болно.

Бид 2012 оны сонгуулийн амжилтаа бататган бэхжүүлэх, УИХ-д өөрсдийн төлөөлөлтэй болж, шийдвэр гаргах бүх түвшинд багаараа ажиллах эрхэм зорилго өмнө минь байгаа. Бид багаараа ялалтыг ахин байгуулж  тавьсан зорилгоо биелүүлж амласан амлалтаа ардчилагчид хэрэгжүүлж чаддаг гэдгийг батлах болно.

Улс орон, орон нутгийнхаа хөгжлийн төлөө бид төсвийн мөнгөнд дулдуйдах биш , дээрээс ирэх санхүүжилтийг харж хүлээх биш өөрсдөдөө  байгаа нөөц бололцоог илүү ихээр олж нээж, тэрнийг хэрхэн ашиглаж, хэрхэн хөгжих талаар өөрсдийн оюун бодлоо уралдуулах ёстой.

Уралдуулж гаргасан оюун бодлынхоо үр шимийг мөрийн хөтөлбөр болгож энэ мөрийн хөтөлбөрийг хамтдаа хэрэгжүүлж Олуулаа амжилттай, олуулаа аз жаргалтай байхын төлөө зорих нь төв аймагчууд, төв аймгийн ардчилагчид бидний эрхэм зорилго юм аа.

Эрх мэдэл, сонгууль, ялалт, ялагдал аль аль нь түр хугацааных. Бид сонгуулиас сонгуулийн хооронд биш хүний төлөө, орон нутгийнхаа хөгжлийн төлөө тогтвортой бодлогыг хэрэгжүүлэн сэтгэлтэй, зүтгэлтэй байхыг та бүхэндээ уриалж байна.

2016-2020 он бол Монгол хүн 2020 хөтөлбөрөө гүйцээн хэрэгжүүлэх бидний он жил, бидний бүтээн байгуулалтын жил байх болноо.

Та бүхэндээ эрүүл саруул байж гүн цэнхэр тэнгэр шигээ саруул сайхан сэтгэж сайхан бүхний төлөө санасан үйл бүхэн тань сэтгэлчлэн бүтэхийн өлзийтэй ерөөл  өргөн дэвшүүлье.

Төв сайхан нутаг маань хөгжин цэцэглэж

Монгол улс маань үүрд мөнх бат оршиг

Эх сурвалж: todaynews.mn