Самсунгийн өв залгамжлагч олон нийтээс уучлал гуйлаа

Самсунг Группын өв залгамжлагч өөрийнх нь компаний санхүүжүүлдэг эмнэлэг MERS вирусын халдварыг тараасанд олон нийтээс уучлал гуйжээ.

Үндэсний телевизийн сувгаар Ли Жае-Ёнг олон нийтэд хандаж үг хэлсэн нь Samsung Foundation санг удирдах болсноосоо хойш анх удаа хийсэн үйлдэл юм.

Samsung Foundation сан нь Самсунг Эрүүл мэндийн Төв нэртэй Өмнөд Солонгосын хамгийн том эмнэлгүүдийн нэгийг эзэмшдэг.

Өмнөд Солонгост гарсан 175 MERS тохиолдлын 85 нь Самсунг Эрүүл мэндийн Төвтэй холбоотой болсон тул уг эмнэлгийн дотоод үйл ажиллагааг шалгаж эхэлжээ.

Ли хэлэхдээ “Манай эмнэлэг MERS вирусын тархалт, халдварыг зогсоож дийлээгүйн улмаас хүмүүст өвчин зовлон учрууллаа. Тиймээс би та бүхний өмнө толгой бөхийн уучлал гуйж байна” гэжээ.

Саудын Арабт гурван жилийн өмнө анх удаа илэрсэн MERS вирус нь Өмнөд Солонгост тархснаас болж 27 хүн амиа алдаад байгаа юм.

Сарын өмнө Ойрхи Дорнодоос Өмнөд Солонгос руу буцсан 68 настай бизнесмэн халдвар тээж ирсэн байж болзошгүй байгаа гэнэ.

47 настай Ли бол Самсунг Группын ерөнхийлөгч Ли Кун-Хигийн ганц хүү бөгөөд 2012 оноос Самсунг Электрониксийн дэд ерөнхийлөгчөөр ажиллаж байгаа юм.

эх сурвалж: ikon.mn