Өглөө.мн Шинэ өглөө, Шинэ мэдээлэл
Монголын Уулчдын Үндэсний Холбоо нь нэг сарын дараа 2018 оны Олон Улсын Уулчдын Холбоо (UIAA)-ны Ерөнхий Ассамблейг зохион байгуулах бэлтгэл ажлаа хангаж байна.
Монголын Уулчдын Үндэсний Холбоог 1955 онд үүсгэн байгуулсан бөгөөд спорт, уулын аялал жуулчлалыг Монголд хөгжүүлэх эрхэм зорилготой билээ. Уг холбоо 2010 оноос хойш олон улсад зохион байгуулж буй тэмцээн уралдаан бүрт оролцож Олон Улсын Уулчдын Холбооны идэвхтэй гишүүн байсаар ирсэн.
Тус холбооны дэд ерөнхийлөгч З.Банзрагч “Энэ нь бидний хувьд түүхэн үйл явдал. Бид энэхүү арга хэмжээнд холбогдох өндөр албан тушаалтнуудыг урьсан бөгөөд өндөр хэмжээнд зохион байгуулна хэмээн найдаж байна” гэлээ.
Түүнчлэн Монголд ууланд авирах хүмүүсийн тоо сүүлийн таван жилд эрчимтэй нэмэгдсэн. Саяхны судалгаанаас үзэхэд гурван хүн тутмын нэг нь тогтмол ууланд авирдаг болсон. Бид Баян-Өлгий аймагт орших гайхалтай байгалийн тогтоц бүхий Алтай таван богдыг санал болгож байна гэжээ.
Энэхүү арга хэмжээний хүрээнд хүрэлцэн ирэх зочид дуу бүжиг хоол гээд Монголын соёл, урлагтай танилцах бүрэн боломжтой. Түүнчлэн зочдод мартагдашгүй дурсамж үлдээх үүднээс нэг өдрийг соёлын өдөр болгох юм.
Монголын Уулчдын Үндэсний Холбоо нь 2019 онд “UIAA Respect the Mountains” арга хэмжээг Ази тивд анх удаа зохион байгуулах хүсэлтэй байна. Ерөнхий Ассамблей-гээр энэхүү асуудлыг хэлэлцэх юм.
Монголын Уулчдын Үндэсний Холбоо
