Өглөө.мн Шинэ өглөө, Шинэ мэдээлэл
NBA-гийн “Өрнөд” бүсийн аваргын төлөөх цуврал тоглолтын зургаа дахьд “Финикс Санс”, “Лос-Анжелес Клипперс”-ийг 27 онооны илүү буюу 130:103-аар хожиж, цувралын харьцаа 4:2 болсноор аваргын төлөө тоглолтод шалгарлаа. Тус багийн 36 настай холбогч Крис Пол 41 оноо, дөрвөн удаа самбараас бөмбөг авч, наймантаа оновчтой дамжуулан, гурвантаа бөмбөг тасалжээ. Плей-оффт үзүүлсэн хувийн дээд амжилтаа давтсан тэрээр бүсийнхээ хагас шигшээ болон шигшээ цуврал тоглолтын сүүлийнхэд 35-аас дээш оноо авсан хамгийн ахмад тоглогч болсон аж. Өмнөх шатанд “Денвер Наггетс”-тай хийсэн цувралын сүүлийнхэд 37 оноо авсан К.Пол 33 настай “нисдэг” Майкл Жорданыг ардаа орхисон нь энэ. Түүнчлэн хасагдах шатанд 40-өөс дээш оноо авсан хамгийн ахмад тоглогч болов. Ийнхүү “Финикс Санс” 28 жилийн дараа аваргын төлөө шалгарлаа. Тэд өмнө нь 1976, 1993 онд шигшээд үлдэж байжээ.
