Өглөө.мн Шинэ өглөө, Шинэ мэдээлэл
Германы машин үйлдвэрлэгчид 2014 онд хийсэн ажлаа тооцоод бүгд маш өндөр ашигтай ажилласан гэсэн дүгнэлт хийсэн байна. Тухайлбал, Германы “Volkswagen” компани өнгөрсөн жил дэлхий даяар 10 сая гаруй автомашин зарсан байна. Бүр тодруулбал, 10.14 сая машин зарсан нь 2013 оныхоос 4.2 хувиар их үзүүлэлт гэдгийг тус концерний удирдах зөвлөлийн тэргүүн Мартин Винтеркорн мэдэгджээ.
Тус концерний борлуулалтын албаны дарга Кристиан Клинглер “Сүүлийн хоёр жилийн дотор манай концерн машины нийлүүлэлтийн хэмжээгээ хоёр дахин нэмэгдүүлсэн” гэсэн байна. Ингэснээр Германы концер нь өмнөх жилүүдийн борлуулалтын манлайлагч Японы “Toyota” компанитай бараг зэрэгцжээ. Японы компани нь өнгөрсөн жил 10.2 сая машин борлуулах төлөвлөгөөтэй байсан тул германчууд гол өрсөлдөгчдөө тун дөхөж очоод байгаа юм. Улмаар Хятад дахь борлуулалт нь өрсөлдөгчөөсөө илүү хурдан өсч байгаа тул 2015 онд баталгаатайгаар манлайлагч болно гэж төлөвлөжээ.
Борлуулалтын хэмжээгээр дэлхийд гуравдугаарт орж байсан Америкийн “General Motors” компани өнгөрсөн жилийн борлуулалтын хэмжээгээр нэг шат буурч дөрөвдүгээрт оржээ. Түүний орыг Францын “Renault-Nissan” компани эзэлсэн байна.
