Хонины цэцэг өвчнийг хяналтанд авахад шуурхай туслалцаа үзүүлэх төслийн нээлт боллоо

Хонины цэцэг өвчнийг хяналтанд авахад шуурхай туслалцаа үзүүлэх төслийн нээлт боллоо. Энэхүү нээлтэнд ХХААЯ-ны Төрийн нарийн бичгийн дарга Н.Ариунболд, НҮБ-ын Хүнс, хөдөө аж ахуйн байгууллага /ХХААБ/-ын ахлах мэргэжилтэн Эран Райзман болон суурин төлөөлөгчид оролцов.

Монгол Улсын Засгийн газрын хүсэлтийн дагуу “Хонины цэцэг өвчнийг хяналтанд авахад шуурхай туслалцаа үзүүлэх нь” техникийн туслалцааны TCP/MON/3603 төслийг НҮБ-ын Хүнс, хөдөө аж ахуйн байгууллагаас санхүүжүүлэн төсөл албан ёсоор  нээлтээ хийсэнээр хэрэгжиж эхэллээ.

Төслийг нээж, ХХААЯ-ны Төрийн нарийн бичгийн дарга Н.Ариунболд хэлсэн үгэндээ “Монгол Улсад 2015 оны 01 дүгээр сард хонины цэцэг өвчин бүртгэгдэж Дорнод, Хэнтий, Сүхбаатар зэрэг 5 аймгийн 15 суманд өвчлөл одоо болтол үргэлжилж байна. Өвчнийг шуурхай оношлох, тархалтыг хязгаарлах, хяналтанд авах зорилгоор шуурхай хариу арга хэмжээг цаг алдалгүй хэрэгжүүлэх, төв орон нутгийн мал эмнэлгийн алба, нэгжийн чадавхийг сайжруулах шаардлага тулгарсан. Иймээс Монгол Улсын Засгийн газрын зүгээс Нэгдсэн Үндэсний Байгууллага (НҮБ)-ын Хүнс, хөдөө аж ахуйн байгууллага (ХХААБ)-д хүсэлт хүргүүлсэн юм. Монгол Улсын Засгийн газрын хүсэлтийг хүлээн авч шуурхай шийдвэрлэж хамтран ажиллаж байгаа Нэгдсэн Үндэсний Байгууллага (НҮБ)-ын Хүнс, хөдөө аж ахуйн байгууллага (ХХААБ)-д талархаж байгаагаа илэрхийлье” хэмээсэн юм.

ХХААЯам, Мал эмнэлэг, үржлийн газраас Хонины цэцэг өвчинтэй тэмцэх олон ажил хэрэгжүүлж байгаагийн нэг нь энэхүү төсөл юм.

Төслийн хүрээнд ХХААЯ, ОБЕГ, ЗГХА МЭҮГ, МХЕГ хамтран:
Хонины цэцэг өвчнөөс сэргийлэх, хяналтанд авах чадавхийг сайжруулах, стратегийг боловсруулахад дэмжлэг үзүүлэх ;
Төв болон орон нутгийн эмч нарт сургалт зохион байгуулах, сургагч багш бэлтгэх, өвчнөөс сэргийлэх, тэмцэх үйл ажиллагааг хэрэгжүүлэх талаар сурталчилгаа хийх;
Өвчин гарсан буюу одоо гарч байгаа аймаг сумдад, оношлогоонд шаардлагатай урвалж, лабораторийн хэрэгсэл, тоног төхөөрөмжийг нийлүүлэх, таригдсан вакцины үйлчилгээний хөлсийг орон нутгийн мал эмнэлгийн нэгжид олгох;
Монгол улсад үйлдвэрлэгдэж байгаа хонины цэцгийн вакцины чанар, өвчний оношийг олон улсын лавлагаа лабораторид баталгаажуулах, дүгнэлт гаргуулах, бүс нутгийн хамтын ажиллагааг өргөгжүүлэхэд нь дэмжлэг үзүүлэх зэрэг ажлыг хийж, хэрэгжүүлэх юм.