Өглөө.мн Шинэ өглөө, Шинэ мэдээлэл
Улс орны эдийн засаг хүндэрч, ард иргэдийг бүсээ чангалахыг уриалан, цалин тэтгэвэр тэтгэмжээс нь хомсолж их өрийн эцсийн төлөөсийг ард иргэд хийх болчихоод байна. Засгийн газраас эх, хүүхдийн халамжийн мөнгийг танах шийдвэр гаргасан бол оюутны холбооноос 70 мянган төгрөгнөөсөө татгалзах уриалгыг гаргаад байгаа юм. Эцсийн дүндээ эрх баригчдын бодлогогүй шийдвэр, хэт тансаглалын горыг ийнхүү ядарсан ард иргэд валютын ханшийн өсөлт, үнийг хөөрөгдөлд дарлуулан байж амсах болоод байна. Сүүлийн үед улс орныг хямралаас гаргах бодлогын дагуу нийт ажилчин, иргэдийн цалин, тэтгэвэр тэтгэмжийг хасаж танах шийдвэр гаргасан. Энэхүү шийдвэрийг эсэргүүцэж Монголын үйлдвэрчний эвлэлээс өнөөдөр Чингисийн талбайд эрүүл мэнд, боловсрол, соёлын салбарын ажилтнууд, иргэдийг оролцуулсан жагсаал зохион байгууллаа.
МҮЭ-ийн холбооноос цалин, тэтгэвэр тэтгэмжийг 60-аас доошгүй хувиар нэмэгдүүлэх шаардлагыг УИХ-д өргөн барьсан бөгөөд нэмэх бус харин цөөхөн хэдэн төгрөгний цалин, тэтгэврийг хасах шийдвэр гаргасны зэрэгцээ эдийн засгаа аврах нэрийн дор улс төрийн эмх замбараагүй байдлаар төрийн албан хаагчдыг ажлаас нь цомхотгож байгаад ийнхүү эсэргүүцэж байгаа юм.
Хэмнэлтийг иргэдийнхээ авдаг цалин тэтгэврээс биш эрх баригч, дарга нарын унадаг том том жийп машин, шатахуун томилолтын зардлаас ч хэмнэж болох боломжтой атал ийнхүү бодлогогүй шийдвэр гаргаж ард иргэдээ хэтэрхий дорд үзэж байгааг эсэргүүцэн “гишүүдийн гүзээн дэх мөнгийг жирэмсэн эхчүүдэд олгоё” зэргийг уриа лоозон гаргажээ.
Валют, долларын ханшийн өсөлт, өргөн хэрэглээний барааны үнийн өсөлт, хэдхэн төгрөгний цалинг даган Монголчууд аль хэдийн бүсээ чангалаад эхэлчихсэн шүү дээ, эрх баригчид аа.
Чангалсан бүсийг дахин чангалах нэрийдлээр “тураал”-д оруулахыг эсэргүүцэх нь дамжиггүй юм. Төрийн ордны цонхоороо өнгийгөөд нийгэм ээ нэг харвал, бүсийг нь чангалуулах гээд байгаа иргэдийнхээ амьдралыг нэг бодолцвол арай ч ийм шийдвэр гаргамааргүй баймаарсан.
Ухаантай гэж сонгосон, төрд итгэл хүлээлгэсэн юмсан даа.
Ч.Мандах
