Өглөө.мн Шинэ өглөө, Шинэ мэдээлэл
Монголын энхийг сахиулагчид байрласнаас хойш нутгаасаа дүрвэсэн иргэд эргэн ирж байна гэж UNMISS буюу Нэгдсэн үндэстний байгууллагын Өмнөд Судан дахь ажиллагаанд үүрэг гүйцэтгэж буй энхийг сахиулагчдын талаар тус улсын Лийр мужийн даргын орлогч Саймон Чуол хэллээ.
UNMISS ажиллагаанд үүрэг гүйцэтгэж буй V ээлжийн мотобуудлагын батальоны хурандаа Б.Баатар захирагчтай бүрэлдэхүүн энхийг сахиулах үндсэн үүргээсээ гадна орон нутагт иргэн-цэргийн харилцааг бэхжүүлсэн арга хэмжээ зохион байгуулж байна.
Батальоны захирагчийн орлогч, дэд хурандаа Ж.Мөнхбаяраар ахлуулсан бүрэлдэхүүн энэ сарын 24-25-ны өдрүүдэд Суданы Лийр, Адок, Тонёор суурингийн иргэдэд урлагийн цогц арга хэмжээг зохион байгуулжээ.
Тэд Монгол Улсын танилцуулга, үлээвэр найрал хөгжим, жагсаал, гардан тулааны үзүүлэх тоглолт, үндэсний бөхийн барилдааны үзүүлбэр зэрэг олон сонирхолтой урлагийн номеруудыг 10 мянга орчим иргэдэд толилуулснаас гадна эрүүл мэндийн үзлэг, үйлчилгээг 100 гаруй орон нутгийн иргэдэд үзүүлсэн байна.
Лийр сууринд зохион байгуулсан арга хэмжээнд Мужийн даргын орлогч Саймон Чуол Биеэл болон орон нутгийн бусад удирдлага, иргэд оролцсон байна.
Мужийн даргын орлогч Саймон Чуол Биеэл:
“Монголын энхийг сахиулагчид манай сууринд ирж байрлан эргүүл хийж эхэлснээс хойш цагийн байдал харьцангуй тайван болсон бөгөөд энэ байдлыг та бүхэн бэлхэнээ харж байгаа байх аа. Иргэд маань одоо орон нутагтаа буцан ирж, мал аж ахуй, газар тариалангаа эрхлэх болсон. Хүмүүсийн амьдрал ахуй ч өдөр өдрөөр дээшилж байна. Энэ бол энхийг сахиулагчдын ач тус юм” хэмээн туйлаас их баярлаж буйгаа илэрхийлжээ. Дараагийн өдөр нь манай энхийг сахиулагчид Засгийн газрын эсрэг хүчний хяналтад байдаг Тонёор, Адок суурингийн иргэдэд арга хэмжээгээ толилуулсан юм.
Адок сууринд байрлах бүсийн командлагч бригадын генерал Габриель Мавих:
“Танай цэргийн алба хаагчдыг өнгөрсөн оны арваннэгдүгээр сараас эхлэн мэдэх болсон. Тэр цагаас эхлэн бид хамтран ажиллаж өөрийн бүс нутагтаа энх тайван, аюулгүй байдлыг тогтоохын төлөө хичээж, энэ хэрээр ч ахиц дэвшил гарсаар байна. Монголын энхийг сахиулагчид байх болсноор НҮБ болон бусад хүмүүнлэгийн байгууллагууд үйл ажиллагаагаа аюулгүй орчинд явуулж, иргэдэд тусламж үйлчилгээг түргэн шуурхай хүргэх болсон. Хоёр гурван сарын өмнө энэ газар хүн бүр зэвсэгтэй, айдсаар дүүрэн явдаг байсан. Харин одоо бол зөвхөн цэргүүд зэвсэг эзэмшиж байна шүү дээ. Энэ бол энхийг сахиулагчдын гавьяа юм. Энэ үйл хэрэгт манай орон нутгийн иргэд туйлаас их баярлаж байна” гэжээ.
Эх сурвалж: Батлан хамгаалах яам
