Өглөө.мн Шинэ өглөө, Шинэ мэдээлэл
Соёлын сайд Ч.Номин “Монгол нүүдэлчин” жуулчны баазын үйл ажиллагаатай танилцаж, аялал жуулчлалын бизнес эрхлэгчидтэй нүүдлийн соёл зан заншил дээр тулгуурласан соёлын аялал жуулчлалд хэрэгцээтэй хөтөлбөр загварчлалыг гаргахаар ярилцлаа.
Монголбанк, Нийслэлийн аялал жуулчлалын газрын хийсэн судалгаагаар Монгол Улсад ирж буй жуулчдын ихэнх нь Монголын уламжлалт зан заншил, соёл, байгальд татагдан ирдэг бөгөөд соёлын аялал жуулчлалын нэгдсэн бодлогогүйн улмаас жуулчны баазууд өөр, өөрийн хэмжээнд монголчуудын уламжлалт амьдралын хэв маяг, соёлыг түгээн таниулсаар иржээ. Мөн тэдгээр жуулчны баазууд нь монголчуудын ахуй соёл, амьдралын хэв маяг, хувцас хэрэглэл зэргийг цогцоор нь бий болгож жуулчдад сурталчлан таниулах тал дээр жишиг болохуйц хөтөлбөр боловсруулж хэрэгжүүлдэг ч соёлын аялал жуулчлал эрхлэхэд Төрийн бодлого шаардлагатай гэж үздэг байна.
Жишээ нь, жуулчдын аялсан маршрут нь манай улсын өв соёлтой шууд холбогдох газар нутгууд байдаг тул энэ чиглэлийн дагуу соёлын аялал жуулчлалыг хөгжүүлэх нь хувийн хэвшил, төрийн байгууллагын хамтарч хийх ёстой ажил хэмээн аялал жуулчлалын бизнес эрхлэгчид хэллээ.
Соёлын аялал жуулчлалыг хөгжүүлэхэд соёлын салбарын оролцоог хангах талаар Соёлын сайд Ч.Номин хэлж, эхний ээлжид Төв аймгийн Зуунмод сумын нутаг дэвсгэрт орших Манзушир хийдийг түшиглэн соёл, шашин, аялал жуулчлалын төв болгохоор төлөвлөж буйгаа танилцууллаа. Мөн нүүдлийн соёл иргэншилд тулгуурласан соёлын аялал жуулчлалыг хөгжүүлэхэд, соёлын салбарын оролцоог хангахад энэ чиглэлийн арвин туршлагатай хувийн хэвшлүүдээс туршлага судалж, хамтарч ажиллах боломжтой гэв.
